Internet lögregla

Nú eru eftirmál dramans í Jokela í héraðinu Tusby að koma í ljós. Sex ungmenni og tveir starfsmenn skólans voru skotin til bana í þessari hryllilegu árás. Ungmennin sem lifðu árásina af telja sum útilokað að þau geti farið aftur í skólan. Ungir krakkar í barnaskólum í nágrenninu skilja ekki hvað dauðinn er og eru hrædd um að morðinginn birtist í þeirra skóla. Hinn átján ára gamli Pekka-Eric Auvinen sagði á netinu stuttu áður en hann framdi þetta ógeðslega dráp "Sennilega kallið þið mig klikkaðan, brjálæðing, psykopat, glæpamann eða eitthvert annað rugl. Nei sannleikurinn er að ég er dýr, manneskja, skuggaleg manneskja." Svo sannarlega beitti hann dýrseðlinu til að geta verið kallaður öllum þeim viðurnefnum sem hann telur upp og mörgum fleiri. Hann skaut 69 skotum í skólanum af þeim um 400 sem hann tók með sér. Myrti átta, særði tólf og skaut síðan í hausinn á sjálfum sér inná klósetti á annari hæð skólans. En hvað er það sem fær dreng til að fremja svona glæp? Hatur segir hann. En þessi einstaklingur lendir líka í hringiðu á netinu og fremur hermiglæp. Þ.e. hann fer nákvæmlega sömu leið og nokkrir háskólafjöldamorðingjar hafa farið í USA. Segir frá glæpnum og varar við honum á netinu. Er þetta öskur á hjálp, frá klikkuðum einstaklingi? Sumir sérfræðingar segja það. Eiga þá ekki sálfræðingar og lögreglan að fara að fylgjast betur með tíðarandanum og vera með deildir sem BB dómsmálaráðherra vill kalla "Internet lögreglan". Hversu marga stórglæpi má koma í veg fyrir með því að vera með virka lögreglu á netinu?