Koma þeir sem koma vilja.

Vorið er komið og sumarið nálgast. Adam Thor á bara tvær vikur eftir í skólanum. Þá fara þau bæði í sumarfrí, Adam og Anna. Petra mun í sumar undirbúa og skrifa masterinn sem hún vonar að verði fullskrifaður fyrir áramót. Búið að vera mikið og strangt nám hjá henni í vetur. Ætlaði að fara í 30 eininga nám en klárar væntanlega rúmlega 40 einingar. Ég er að klára barnasögu sem bókaforlag pantaði. Í sumar geng ég frá leikriti fyrir mitt gamla leikfélag á Sauðárkróki, sem er búið að vera um þrjú ár að þróast í tölvunni minni. Einnig mun sumarið fara í að undirbúa verkefni vetrarins. Ég fer til Íslands í ágúst til að leikstýra á Sauðárkróki nýja verkinu sem heitir ALINA. Ef allt gengur eftir á bókin á að koma út sama dag og við frumsýnum, 20. okt. Allt hittir þetta á 20 ára afmæli mitt sem leikari. En ég mun síðan drífa mig aftur "heim". Þar bíður mín spennandi verkefni hjá Borgaleikhúsi Vasa. Nefnilega að leikstýra "Ofviðrinu" eftir W. Shekspeare á stóra sviðinu. Til að sjá um tónlistina hef ég fengið til liðs við mig Hilmar Örn Hilmarsson. Frumsýning á þessu frábæra ævintýri er áætluð 2. febrúar 2008.

Frístundirnar fara svo í að taka á móti ættingjum og vinum frá Íslandi, sigla um skerjagarðinn á Raisu og náttúrulega að dunda eitthvað í bústaðnum.