Makalúlú fuglinn

Góðir hálsar. Er byrjaður á nýju ævintýri. Reyndar fyrir nokkru. Hér á eftir er upphafið á öðrum þætti. Hvernig líkar þér tónninn?

Makalúlú fuglinn
Gargandi snilld, ekkert annað en gargandi snilld, hugsaði Heimsálfur. Makalúlú fuglar lifa bara við stóra vatnið sunnan við sléttu nornanna, inn á milli hárra fjalla. Makalúlú er því einskonar nornafugl. Nú sveif þessi stóri litfagri fugl á þöndum vængjum í átt að Álfadal, rétti úr sér og settist á sína löngu rauðu spóaleggi. Hann hneigði höfuðið í átt að Heimsálfi og ældi uppúr sér undarlegu bréfsnifsi. Heimsálfi hafði borist skeyti með Makalúlú fuglinum. Þar stóð með afar sérstökum stöfum „Arúkúrí raha berrúsí“ og svo voru tölustafirnir 034. Hann vissi að skeytið var skrifað á galdranornamáli því forðum hafði hann kynnst nornunum í suðri.